មើលលម្អិត

សភាជប៉ុនទំនងជាតម្រូវឱ្យសមាជិកសភា ១ រូប ដែលអវត្តមានពីសម័យប្រជុំសភា សុំទោសក្នុងសភា

សភាជប៉ុនទំនងជាតម្រូវឱ្យសមាជិកសភា ១ រូប សុំទោសក្នុងសភា

មន្ត្រីជាន់ខ្ពស់គណបក្សកាន់អំណាច និងគណបក្សប្រឆាំងដ៏ធំជាងគេក្នុងប្រទេសជប៉ុន បានឯកភាពគ្នា តម្រូវឱ្យសមាជិកសភាជាន់ខ្ពស់ជប៉ុន ១ រូប ដែលមិនបានចូលរួមក្នុងសម័យប្រជុំសភា សូម្បីតែមួយលើក សុំទោសនៅក្នុងសភា។ លោក Yoshikazu Higashitani សមាជិកសភាជាន់ខ្ពស់ ដែលជាម្ចាស់គណនី YouTube ឈ្មោះ GaaSyy ទទួលបាន ១ អាសនៈ ក្នុងការបោះឆ្នោតសភាជាន់ខ្ពស់កាលពីខែកក្កដា ឆ្នាំ២០២២។ សមាជិកសភារូបនេះ គឺជាសមាជិកគណបក្ស NHK ដែលកម្មវិធីនយោបាយរបស់គណបក្សនេះ អំពាវនាវឱ្យកែទម្រង់ការផ្សាយវិទ្យុសាធារណៈ។ លោក GaaSyy មិនបានចូលរួមក្នុងសម័យប្រជុំសភាម្តងណាឡើយ ដោយលោកបានអះអាងថា កំពុងស្នាក់នៅក្នុងប្រទេសអេមីរ៉ាតអារ៉ាប់រួម។ កាលពីថ្ងៃចន្ទ ទី២០ ខែកុម្ភៈ ឆ្នាំ២០២៣ មន្ត្រីជាន់ខ្ពស់គណបក្សប្រជាធិបតេយ្យសេរី និងគណបក្ស ប្រជាធិបតេយ្យរដ្ឋធម្មនុញ្ញបានពិភាក្សាគ្នាមួយថ្ងៃ មុនគណៈកម្មាធិការវិន័យនៃសភាជាន់ខ្ពស់ នឹងសម្រេច ដាក់ទណ្ឌកម្មកម្រិតណាមួយ។ សមាជិកគណបក្សប្រជាធិបតេយ្យរដ្ឋធម្មនុញ្ញ បានថ្លែងថា សមាជិកសភាគណបក្សប្រឆាំងមួយចំនួន កំពុងអំពាវនាវឱ្យបញ្ចប់មុខតំណែងលោកពីសភា ដែលជាកម្រិតទណ្ឌកម្មផ្នែកវិន័យធ្ងន់ធ្ងរជាងគេក្នុងចំណោមកម្រិតទណ្ឌកម្មទី៤។ សមាជិកសភាគណបក្សប្រជាធិបតេយ្យសេរីបានថ្លែងថា គណបក្ស នយោបាយជាច្រើនកំពុងគាំទ្រសំណើឱ្យមានការសុំទោស ដោយបានអះអាងថា ខ្លួនចង់ឱ្យសភាផ្តល់នូវការឆ្លើយតបជាឯកច្ឆន្ទ។ មន្ត្រីជាន់ខ្ពស់គណបក្សនយោបាយទាំងនោះ បានឯកភាពគ្នាទទូចឱ្យសមាជិកសភារូបនេះ សុំទោសក្នុងសម័យប្រជុំសភា ដែលជាទណ្ឌកម្មធ្ងន់ធ្ងរបំផុតជាងគេកម្រិតទី៣។ លោក Seko Hiroshige សមាជិកសភាជាន់ខ្ពស់គណបក្សប្រជាធិបតេយ្យសេរី បានថ្លែងថា សភាកំពុងប្រឈមមុខនឹងស្ថានការណ៍មិនធ្លាប់ជួបពីមុនមក ដោយបានបន្ថែមទៀតថា លោកចង់ឱ្យសមាជិកសភារូបនេះ ឆ្លើយតបដោយភាពស្មោះត្រង់។ លោកស្រី Tanabu Masayo សមាជិកាសភាជាន់ខ្ពស់ គណបក្សប្រជាធិបតេយ្យរដ្ឋធម្មនុញ្ញ បានថ្លែងថា វាមានសារៈសំខាន់ណាស់ចំពោះរូបលោក ឆ្លើយតបនឹងសំណើសុំទោសរបស់មន្ត្រីជាន់ខ្ពស់គណបក្សនយោបាយទាំងនោះ ម្យ៉ាងវិញទៀត មន្ត្រីគណបក្សនយោបាយទាំងនោះ នឹងពិភាក្សាគ្នាលើបញ្ហាទាំងនោះបន្តទៀត៕

ព័ត៌មានសភាទ្វីបអាស៊ី ២១-០២-២៣-កែវ ធាវី ប្រែសម្រួលពី៖ https://www3.nhk.or.jp/nhkworld/en/news/20230220_33/

សភាបណ្តាទ្វីបពាក់ព័ន្ធ៖

ទ្វីអាស៊ី និងអូសេអានី

ទ្វីបអឺរ៉ុប

ទ្វីបអាមេរិក

ទ្វីបអាហ្វ្រិក