មើលលម្អិត

ភាពខុសគ្នារវាងប្រធានាធិបតី និងអធិការបតី នៃសាធារណរដ្ឋសហព័ន្ធអាល្លឺម៉ង់

Frank-Steinmeier ប្រធានាធិបតី(រូបខាងឆ្វេង) លោកOlaf Scholz អធិការបតី (រូបខាងស្តាំ) អាល្លឺម៉ង់

នៅក្នុងសាធារណរដ្ឋសហព័ន្ធអាល្លឺម៉ង់ ប្រធានាធិបតី គឺជាប្រមុខរដ្ឋ ចំណែកអធិការបតី គឺជាប្រមុខ រដ្ឋាភិបាល។ ទាំងប្រមុខរដ្ឋ និងប្រមុខរដ្ឋាភិបាល សុទ្ធតែត្រូវបានបោះឆ្នោតជ្រើសតាំងដោយសភាជាន់ទាប សម្រាប់អាណត្តិដែលមានរយៈពេល៥ឆ្នាំ និង៤ឆ្នាំ លើសពីមួយអាណត្តិ។ ខាងក្រោមនេះគឺភាពខុសគ្នានៃតួនាទី និងភារកិច្ចរបស់ប្រធានាធិបតី និងអធិការបតី នៃសាធារណសហព័ន្ធអាល្លឺម៉ង់។ ប្រធានាធិបតី៖ · ប្រធានាធិបតីអាល្លឺម៉ង់ គឺជាប្រមុខរដ្ឋនៃសាធារណរដ្ឋសហព័ន្ធអាល្លឺម៉ង់ · តួនាទីចម្បងរបស់ប្រធានាធិបតី គឺតំណាងឱ្យប្រទេស ទាំងក្នុងប្រទេស និងលើឆាកអន្តរជាតិ · ប្រធានាធិបតី ក៏ទទួលខុសត្រូវផងដែរ ក្នុងការតែងតាំងអធិការបតី · ប្រធានាធិបតីបច្ចុប្បន្នរបស់សហព័ន្ធអាល្លឺម៉ង់ គឺលោកFrank-Steinmeier ដែលត្រូវបានជ្រើស តាំងជាប្រធានាធិបតីក្នុងខែកុម្ភៈ ឆ្នាំ២០១៧ ហើយត្រូវបានជ្រើសតាំងជាថ្មីម្តងទៀត ក្នុងខែកុម្ភៈ ឆ្នាំ២០២២ · ប្រធានាធិបតីមានអាណត្តិរយៈពេល៥ឆ្នាំ ហើយអាចកាន់តំណែងបានតែ ២អាណត្តិ ប៉ុណ្ណោះ · ប្រធានាធិបតី មិនពាក់ព័ន្ធនឹងការងារអភិបាលកិច្ចប្រទេសប្រចាំថ្ងៃឡើយ។ ការងារនេះ ជារបស់អធិការបតី · ទោះបីជាយ៉ាងនេះក្តី ប្រធានាធិបតីមានអំណាចសំខាន់ៗជាច្រើន ដូចជាអំណាចក្នុងការរំលាយសភា និងអំណាចក្នុងការកំណត់ឱ្យមានការបោះឆ្នោតជ្រើសជ្រើសតាំងសមាជិកសភាថ្មី · សភា៖ សាធារណរដ្ឋសហព័ន្ធអាល្លឺម៉ង់ មានសភាពីរថ្នាក់ គឺសភាជាន់ទាប (The Bundesta ge) និងសភាជាន់ខ្ពស់(The Bundesrat)។ សមាជិកសភាជាន់ទាប ត្រូវបានជ្រើសតាំងតាម រយៈការបោះឆ្នោតពីសំណាក់ប្រជាពលរដ្ឋនៅក្នុងមណ្ឌលបោះឆ្នោត ខណៈសមាជិកសភាជាន់ខ្ពស់ គឺជាតំណាងរបស់តំណាងតំបន់ ឬរដ្ឋ (ខេត្ត) ក្រោមចំណុះដែនដីសហព័ន្ធ។ ក្រៅពីភារកិច្ចក្នុងការបង្កើតច្បាប់ និងត្រួតពិនិត្យលើផ្នែកផ្សេងៗនៃគោលនយោបាយរបស់រដ្ឋាភិបាល សមាជិកសភាទាំងពីរថ្នាក់ ក៏មានអំណាចផងដែរក្នុងការសាកសួរសមាជិកគណៈរដ្ឋមន្រ្តី អំពីការងារផ្សេងៗ នៅក្នុងអំឡុងពេលនៃសម័យប្រជុំសភា។ អធិការបតី៖ អធិការបតី គឺជាប្រមុខរដ្ឋាភិបាល និងជាអ្នកទទួលខុសត្រូវគ្រប់គ្រងគណៈរដ្ឋមន្រ្តី និងគ្រប់គ្រងការអនុវត្តការងារផ្សេងៗរបស់ស្ថាប័ននេះ។ អធិការបតី ក៏ទទួលខុសត្រូវផងដែរចំពោះការសម្របសម្រួលសកម្មភាពរបស់បណ្តាក្រសួងផ្សេងៗរបស់សហព័ន្ធ។ លើសពីនេះទៅទៀត អធិការបតី គឺជាតំណាងប្រទេសអាល្លឺម៉ង់ក្នុងការចរចានានា លើឆាកអន្តរជាតិ និងដើរតួនាទីជាប្រមុខរដ្ឋ នៅពេលគ្មានប្រមុខរដ្ឋ។ អធិការបតីត្រូវជ្រើសតាំងដោយសភាជានទាប (The Bundestag)។ អធិការបតី ក៏មានអំណាចផងដែរក្នុងការរំលាយសភា ប្រកាសដាក់រដ្ឋក្នុងគ្រាអាសន្ន និងចេញក្រឹត្យផ្សេងៗរបស់អង្គនីតិប្រតិបត្តិ។ ភាពខុសគ្នាដ៏សំខាន់មួយ រវាងប្រធានាធិបតី និងអធិការបតី គឺអធិការបតីអាចធ្វើការដោយឯករាជ្យ ខណៈ ដែលប្រធានាធិបតីសម្រេចធ្វើការអ្វីមួយ ត្រូវការគាំទ្រពីសមាជិកសភាជាន់ទាបភាគច្រើន។ លើសពីនេះទៅទៀត ប្រធានាធិបតីមិនអាចកាន់តំណែងលើសពី២អាណត្តិជាប់គ្នាឡើយ ខណៈដែលអធិការបតីមិនត្រូវបានគេកំណត់ចំនួនអាណត្តិសម្រាប់កាន់តំណែងឡើយ។ អធិការបតីបច្ចុប្បន្នរបស់សហព័ន្ធអាល្លឺម៉ង់ គឺលោក Olaf Scholz ឡើងកាន់តំណែងក្នុងឆ្នាំ២០២១។ លោកOlaf Scholz គឺជាអតីតរដ្ឋមន្រ្តីក្រសួងហិរញ្ញវត្ថុ និងជាអតីតអធិការបតីរង ក្នុងរដ្ឋាភិបាលបក្សសម្ព័ន្ធ របស់លោកស្រីអធិការបតីAngela Merkel (២០១៨-២០២១)។ ការបោះឆ្នោត៖ ប្រធានាធិបតីសាធារណរដ្ឋសហព័ន្ធអាល្លឺម៉ង់ ត្រូវបានជ្រើសតាំងតាមរយៈការបោះឆ្នោតដោយផ្ទាល់ ពីសំណាក់សមាជិកសភាជាន់ទាប និងប្រតិភូតំណាងឱ្យរដ្ឋ (ខេត្ត) ឬតំបន់ នៃដែនដីសាធារណរដ្ឋសហព័ន្ធ អាល្លឺម៉ង់។ ប្រធានាធិបតីមានអាណត្តិរយៈពេល៥ឆ្នាំ ហើយកាន់តំណែងបានតែ២អាណត្តិប៉ុណ្ណោះ។ ចំណែកអធិការបតីវិញ អធិការបតីត្រូវតែងតាំង (Appoint) ដោយប្រធានាធិបតី បន្ទាប់ពីការពិភាក្សាជាមួយសភាជាន់ទាប ឬមានន័យការត្រូវការគាំទ្រពីសមាជិកសភាភាគច្រើន។ អធិការបតីមិនចាំបាច់ជាសមាជិកសភាឡើយ ប៉ុន្តែជារឿយៗអធិការបតី គឺជាសមាជិកសភានៃគណបក្សក្នុងរដ្ឋាភិបាល។ មួយអាណត្តិរបស់អធិការបតី គឺមានរយៈពេល៤ឆ្នាំ ប៉ុន្តែក្នុងស្ថានភាពចាំបាច់ អាចពន្យារដល់៦ឆ្នាំ បាន៕

ព័ត៌មានសភាអឺរ៉ុប ០៧-០២-២៣-មាស តូនី

ប្រែសម្រួលពី៖ https://allthedifferences.com/difference-between-a-german-president-and-a-chancellor/

សភាបណ្តាទ្វីបពាក់ព័ន្ធ៖

ទ្វីអាស៊ី និងអូសេអានី

ទ្វីបអឺរ៉ុប

ទ្វីបអាមេរិក

ទ្វីបអាហ្វ្រិក