មើលលម្អិត

បន្ទាប់ពីសភាអនុម័ត អេស្តូនីក្លាយជាប្រទេសដំបូងគេនៅអឺរ៉ុបកណ្តាល ដែលអនុញ្ញាតឱ្យរៀបអាវាហ៍វិវាហ៍ភេទដូចគ្នា

លោកស្រី Kaja Kallas នាយករដ្ឋមន្រ្តីនៃសាធារណរដ្ឋអេស្តូនី គាំទ្រអាវាហ៍វិវាហ៍ភេទដូចគ្នា

កាលពីថ្ងៃអង្គារ ទី២០ ខែមិថុនា ឆ្នាំ២០២៣ សភានៃសាធារណរដ្ឋអេស្តូនីបានអនុម័តគាំទ្រច្បាប់មួយផ្តល់ភាពស្របច្បាប់ចំពោះអាវាហ៍វិវាហ៍ភេទដូចគ្នា។ ការអនុម័តនេះបានធ្វើឱ្យអេស្តូនីក្លាយជាប្រទេស ដំបូងគេនៅអឺរ៉ុបកណ្តាលដែលធ្វើបែបនេះ។ អាវាហ៍វិវាហ៍ភេទដូចគ្នា មានភាពស្របច្បាប់នៅក្នុងប្រទេសភាគច្រើននៅអឺរ៉ុបខាងលិច ប៉ុន្តែមានមិនច្រើនទេនៅអឺរ៉ុបកណ្តាលដែលធ្លាប់ស្ថិតក្រោមការគ្រប់គ្រងរបស់ជនកុម្មុយនិស្ត និងជាសមាជិកសម្ព័ន្ធមិត្តកិច្ចព្រមព្រៀងទីក្រុងវ៉ាសូវីដែលដឹកនាំដោយទីក្រុងមូស្គូ ប៉ុន្តែពេល នេះជាសមាជិកអង្គការណាតូ និងភាគច្រើនជាសមាជិកសហភាពអឺរ៉ុប។ សេចក្តីព្រាងច្បាប់ខាងលើ ទទួលបានការគាំទ្រក្នុងសំឡេង ៥៥ នៃសភា ១០១អាសនៈ ពីគណបក្សចម្រុះសេរីនិយម និងគណបក្សសង្គមប្រជាធិបតេយ្យដែលដឹកនាំដោយលោកស្រី Kaja Kallas ដែលទទួលជ័យជម្នះក្នុងការបោះឆ្នោត២០២៣។ លោកស្រីនាយករដ្ឋមន្រ្តីបានថ្លែងថា សាររបស់លោកស្រីទៅកាន់អឺរ៉ុបកណ្តាលនោះគឺ វាជាការប្រយុទ្ធមួយដ៏លំបាក ប៉ុន្តែអាវាហ៍វិវាហ៍ និងក្តីស្រលាញ់ គឺជាអ្វីមួយដែលអ្នកត្រូវតែលើកកម្ពស់។ “យើងបានអភិវឌ្ឍជាច្រើនក្នុង ពេល៣០ឆ្នាំមកនេះ ចាប់តាំងពីយើងទទួលបានសេរីភាពរួចផុតពីការត្រួតត្រារបស់អតីតសហភាពសូវៀត។ ពេលនេះយើងស្មើភាពក្នុងចំណោមប្រទេសមានតម្លៃដូចគ្នា”។ សេចក្តីព្រាងច្បាប់ខាងលើនឹងចូលជាធរមានចាប់ពីឆ្នាំ២០២៤តទៅ។ នៅក្នុងប្រទេសដែលប្រជាជនភាគច្រើនមិនកាន់សាសនានៅក្នុងតំបន់បាល់ទិកមួយនេះ ប្រទេសអេស្តូនីមានប្រជាជនតែជាង ១.៣លាននាក់ប៉ុណ្ណោះ ហើយ៥៣% ក្នុងចំណោមពួកគេគាំទ្រអាវាហ៍វិវាហ៍ភេទដូចគ្នា នេះបើតាមការស្ទង់មតិមួយធ្វើឡើងក្នុងឆ្នាំ២០២៣នេះ ដោយមជ្ឈមណ្ឌលដើម្បីសិទ្ធិមនុស្ស។ កាលពី ១ទសវត្សរ៍មុនមានចំនួនតែ ៣៤%។ ប៉ុន្តែយ៉ាងណាក៏ដោយ ៣៨% នៃប្រជាជនអេស្តូនីនៅតែចាត់ទុកថា ការទំនាក់ទំនងផ្លូវភេទភេទដូចគ្នា នៅតែមិនអាចទទួលយកបាន។ អាវាហ៍វិវាហ៍ភេទដូចគ្នា ត្រូវបានជំទាស់ដោយជនជាតិភាគតិចរុស្ស៊ី ដែលមានជាង ១ភាគ៤នៅក្នុងប្រទេស ហើយមានតែ ៤០%ប៉ុណ្ណោះក្នុងចំណោមពួកគេដែលគាំទ្រ។ គួរបញ្ជាក់ផងដែរប្រទេសឡេតូនី និងលីទុយអានី ជាប្រទេស២ ផ្សេងទៀតនៅក្នុងតំបន់បាល់ទិកដែលធ្លាប់ជាឧបសម្ព័ន្ធរបស់អតីតសហភាពសូវៀតនោះ ក៏មានសេចក្តីព្រាងច្បាប់ស្តីពីអាវាហ៍វិវាហ៍ភេទដូចគ្នាផងដែរ ប៉ុន្តែកំពុងតែជាប់គាំងនៅក្នុងសភានៅឡើយ៕ http://ព័ត៌មានសភាទ្វីបអឺរ៉ុប ២១-០៦-២៣- ឈាវ សុផាត ប្រែសម្រួលពី៖ https://www.devdiscourse.com/article/politics/2494932-estonia-becomes-first-central-european-country-to-allow-same-sex-marriage

សភាបណ្តាទ្វីបពាក់ព័ន្ធ៖

ទ្វីអាស៊ី និងអូសេអានី

ទ្វីបអឺរ៉ុប

ទ្វីបអាមេរិក

ទ្វីបអាហ្វ្រិក