មើលលម្អិត

សភាអេហ្ស៊ីប អនុម័តគាំទ្រសេចក្តីព្រាងច្បាប់ហាមឃាត់ ម្ចាស់សុនខដែលគ្មានលិខិតអនុញ្ញាត

ទិដ្ឋភាពទូទៅនៅក្នុងសភានៃសាធារណរដ្ឋអារ៉ាប់អេហ្ស៊ីប

សភាតំណាងនៃសាធារណរដ្ឋអារ៉ាប់អេហ្ស៊ីប បានអនុម័តគាំទ្រលើសេចក្តីព្រាងច្បាប់មួយស្តីពីការគ្រប់ គ្រងការកាន់កាប់សត្វ និងសុនខដែលមានគ្រោះថ្នាក់។ សេចក្តីព្រាងច្បាប់ដែលមាន២៩មាត្រា បានរួមបញ្ចូលនូវការត្រួតពិនិត្យថ្មីលើម្ចាស់សត្វសុនខ និងវិធានការដើម្បីទប់ស្កាត់ការរីករាលដាលនៃសត្វអនាថា។ លោក Ahmed El-Sigini ប្រធានគណៈកម្មាធិការរដ្ឋបាលមូលដ្ឋាននៃសភាតំណាងអេហ្ស៊ីប និងជាអ្នកតាក់តែងសេចក្តីព្រាងច្បាប់បានថ្លែងថា សេចក្តីព្រាងច្បាប់នេះធ្វើឡើងសំដៅដោះស្រាយការកាន់កាប់ និងគ្រប់ គ្រងសត្វដែលមានគ្រោះថ្នាក់ និងម្ចាស់សត្វសុនខដែលគ្មានលិខិតអនុញ្ញាត ព្រមទាំងការរីករាលដាលនៃសត្វសុនខអនាថាដែលគំរាមកំហែងដល់ជីវិតប្រជាជន។ សេចក្តីព្រាងច្បាប់មួយនេះធ្វើឡើងដើម្បីឆ្លើយតបទៅនឹងពាក្យបណ្តឹងរាប់ពាន់ដែលសភាទទួលបានពីពលរដ្ឋ ដើម្បីចាត់វិធានការនីតិប្បញ្ញត្តិប្រឆាំងនឹងសត្វសុនខអនាថាដែលគំរាមកំហែងដល់ជីវិតប្រជាជននៅតាមផ្លូវ និងដើម្បីគ្រប់គ្រងការកាន់កាប់សត្វដែលមានគ្រោះថ្នាក់ដែលវាយប្រហារពលរដ្ឋ ជាពិសេស កុមារ និងមនុស្សចាស់។ សេចក្តីព្រាងច្បាប់ខាងលើ អនុលោមតាមកិច្ចព្រមព្រៀងអន្តរជាតិដែលអេហ្ស៊ីបបានចុះហត្ថលេខា និងបទប្បញ្ញត្តិដែលអនុម័តដោយអង្គការសុខភាពពិភពលោក (WHO)។ ថ្មីៗនេះអេហ្ស៊ីបរងការកក្រើករញ្ជួយពីឧបទ្ទវហេតុដ៏ខ្លោចផ្សាដែលសត្វសាហាវ និងសត្វសុនខ (ដូចជា ប្រភេទ pit bull ជាដើម) បានវាយប្រហារពលរដ្ឋ និងនាំទៅដល់ការស្លាប់បាត់បង់ជីវិតផងដែរ។ តាមតួលេខផ្លូវការបង្ហាញថា មានករណីសត្វសុនខខាំ ជាង ៤០០,០០០ករណី កាលពីឆ្នាំ២០២២ ដែលធ្វើឱ្យរតនាគារជាតិត្រូវរ៉ាប់រងចំណាយថវិកា ដ៏មហាសាលក្នុងការនាំចូលវ៉ាក់សាំងជំងឺឆ្កែឆ្កួតដើម្បីព្យាបាលជនរងគ្រោះ។ នេះបើតាមលោក Hisham El-Hossary ប្រធានគណៈកម្មាធិការកសិកម្មនៃសភាតំណាងអេហ្ស៊ីបបានថ្លែងឱ្យដឹង។ សេចក្តីព្រាងច្បាប់នេះក៏ធ្វើឡើងដើម្បីទប់ស្កាត់បុគ្គលដែលកាន់កាប់ ឬបណ្តើរសត្វសាហាវដោយសេរីនៅទីកន្លែងសាធារណៈ ដូចជា សួនច្បារ សួនឧទ្យាន តំបន់លំនៅដ្ឋាន និងសណ្ឋាគារដោយមិនបានបង្ការទុកជាមុនដើម្បីការពារប្រជាជនពីសត្វទាំងនេះ។ សេចក្តីព្រាងច្បាប់បានចែងថា ម្ចាស់សត្វត្រូវមានអាយុចាប់ពី១៨ឆ្នាំឡើងទៅត្រូវសុំលិខិតអនុញ្ញាតសត្វសុនខរបស់ពួកគេក្នុងអំឡុងពេល ៦ខែ បន្ទាប់ពីច្បាប់នេះត្រូវបានអនុម័ត។ លិខិតអនុញ្ញាតនឹងមានតម្លៃក្នុងរវាងចាប់ពី ១,០០០ ដល់ ១៥,០០០អេហ្ស៊ីបផោន (EGP)។ សេចក្តីព្រាងច្បាប់នឹងដាក់ទោសធ្ងន់ធ្ងរលើម្ចាស់សុនខដែលមិនទទួលបានលិខិតអនុញ្ញាតដោយត្រូវជាប់ពន្ធនាគារក្នុងរវាងពី ១ឆ្នាំ ទៅ២០ឆ្នាំ និងពិន័យជាប្រាក់ ពី ១០០,០០០ ទៅ ៤លានអេហ្ស៊ីបផោន (EGP)៕ http://ព័ត៌មានសភាទ្វីបអាហ្រ្វិក ០២-០៥-២៣- ឈាវ សុផាត ប្រែសម្រួលពី៖ https://english.ahram.org.eg/News/498788.aspx

សភាបណ្តាទ្វីបពាក់ព័ន្ធ៖

ទ្វីអាស៊ី និងអូសេអានី

ទ្វីបអឺរ៉ុប

ទ្វីបអាមេរិក

ទ្វីបអាហ្វ្រិក