មើលលម្អិត

សភាដាណឺម៉ាកទទូចឱ្យសមាជិកសភា និងបុគ្គលិកសភា លុបចោលកម្មវិធី ចែករំលែកវីដេអូ TikTok របស់ចិន ដោយបារម្ភពីសន្តិសុខតាមប្រព័ន្ធអ៊ីនធឺណិត

កម្មវិធីចែករំលែកវីដេអូតាមបណ្តាញទំនាក់ទំនងសង្គមរបស់ចិន TikTok ដ៏កំពុងពេញនិយម

សភានៃព្រះរាជាណាចក្រដាណឺម៉ាក បានទទូចឱ្យអ្នកនយោបាយ និងបុគ្គលិករបស់ខ្លួនលុបចោល កម្មវិធីចែករំលែកវីដេអូតាមបណ្តាញទំនាក់ទំនងសង្គមដ៏ពេញនិយមមួយ ឈ្មោះ TikTok ចេញពីទូរស័ព្ទរបស់ខ្លួនដើម្បីជាវិធានការសន្តិសុខតាមប្រព័ន្ធអ៊ីនធឺណិត ព្រោះតែហានិភ័យនៃចារកម្ម (ការលួចយកទិន្ន ន័យ)។ កម្មវិធី TikTok ដែលមានជនជាតិចិនជាម្ចាស់កម្មសិទ្ធិ បានប្រឈមនឹងការរឹតបន្តឹងសន្តិសុខនៅក្នុងទ្វីបអឺរ៉ុប និងនៅសហរដ្ឋអាម៉េរិកពាក់ព័ន្ធនឹងសន្តិសុខ និងទិន្នន័យឯកជន ដោយសារមានក្តីព្រួយបារម្ភថា កម្មវិធី TikTok មួយនេះអាចនឹងត្រូវបានប្រើប្រាស់ដើម្បីលើកកម្ពស់ទស្សនៈគាំទ្ររដ្ឋាភិបាលទីក្រុង ប៉េកាំង ឬលួចយកព័ត៌មានឯកជនរបស់អ្នកប្រើប្រាស់។ លោក Søren Gade ប្រធានសភាដាណឺម៉ាកបានថ្លែងថា សំបុត្រអេឡិចត្រូនិក (e-mail) មួយត្រូវបានផ្ញើចេញ កាលពីថ្ងៃអង្គារ ទី២៨ ខែកុម្ភៈ ឆ្នាំ២០២៣ ទៅកាន់សមាជិកសភាទាំង ១៧៩រូប និងបុគ្គលិកសភា ជាមួយនឹងការផ្តល់អនុសាសន៍ខ្លាំងៗឱ្យលុបចោលកម្មវិធី TikTok ប្រសិនបើអ្នកបានតម្លើងកម្មវិធីមួយនេះ។ វិធានការរបស់សភាបានធ្វើឡើងបន្ទាប់ពីមានការវាយតម្លៃមួយចេញពីមជ្ឈមណ្ឌលសន្តិសុខតាមប្រព័ន្ធអ៊ីនធឺណិតរបស់ដាណឺម៉ាកបានរកឃើញពីហានិភ័យនៃចារកម្ម។ មជ្ឈមណ្ឌលមួយនេះ គឺជាផ្នែកមួយនៃទីភ្នាក់ងារស៊ើបការសំងាត់បរទេសរបស់ដាណឺម៉ាក។ ភ្លាមៗនេះ គេនៅមិនទាន់ដឹងថាតើ មានសមាជិកសភាដាណឺម៉ាកច្រើនប៉ុណ្ណា ដែលបានតម្លើងកម្មវិធី TikTok។ ប៉ុន្តែក្នុងរយៈពេលប៉ុន្មានថ្ងៃមកនេះ មានអ្នកនយោបាយជាច្រើនរូបបានប្រកាសជាសាធារណៈថា ពួកគាត់បានលុបចោលកម្មវិធីមួយនេះពីទូរសព្ទការងាររបស់ពួកគាត់ព្រោះហេតុផលសន្តិសុខតាមប្រព័ន្ធអ៊ីនធឺណិត។ គួរបញ្ជាក់ផងដែរថា កាលពីដើមខែកុម្ភៈ អង្គនីតិប្រតិបត្តិរបស់សហភាពអឺរ៉ុបបានថ្លែងថា ខ្លួនបានហាមឃាត់បុគ្គលិកពីការប្រើប្រាស់កម្មវិធី TikTok នៅលើទូរសព្ទជាបណ្តោះអាសន្នដើម្បីជា វិធានការសន្តិសុខតាមប្រព័ន្ធអ៊ីនធឺណិត។ វិធានការរបស់សហភាពអឺរ៉ុប បានដើរតាមវិធានការដូចគ្នានេះដែលធ្វើឡើងនៅសហរដ្ឋអាម៉េរិក ដែលក្នុងនោះជាងពាក់កណ្តាលនៃ៥០រដ្ឋ នៅទូទាំងប្រទេស និងសភាសហរដ្ឋអាម៉េរិកបានហាមឃាត់ការប្រើប្រាស់កម្មវិធីចែករំលែកវីដេអូតាមបណ្តាញសង្គម TikTok នៅលើឧបករណ៍ផ្លូវការរបស់រដ្ឋាភិបាល៕

ព័ត៌មានសភាទ្វីបអឺរ៉ុប ០១-០៣-២៣- ឈាវ សុផាត ប្រែសម្រួលពី៖ https://www.euronews.com/2023/02/28/denmarks-parliament-urges-politicians-to-delete-tiktok-over-cybersecurity

សភាបណ្តាទ្វីបពាក់ព័ន្ធ៖

ទ្វីអាស៊ី និងអូសេអានី

ទ្វីបអឺរ៉ុប

ទ្វីបអាមេរិក

ទ្វីបអាហ្វ្រិក