មើលលម្អិត

សភាអឺរ៉ុបហាមឃាត់ការប្រើកម្មវិធី TikTok របស់ចិនលើឧបករណ៍បំពេញការងារ

កម្មវិធីចែករំលែកវីដេអូតាមបណ្តាញទំនាក់ទំនងសង្គម TikTok ដ៏ពេញនិយមរបស់ក្រុមហ៊ុនចិន ByteDane

សភាអឺរ៉ុបបានប្រាប់បុគ្គលិករបស់ខ្លួនឱ្យលុបចោលកម្មវិធី TikTok ពីឧបករណ៍ដែលប្រើសម្រាប់បំពេញការងារ ដោយសារព្រួយបារម្ភពីសុវត្ថិភាពទិន្នន័យ បន្ទាប់ពីវិធានការដូចគ្នានេះ ត្រូវបានធ្វើឡើងដោយអង្គនីតិប្រតិបត្តិដ៏សំខាន់របស់សហភាពអឺរ៉ុបកាលពីសប្តាហ៍មុន។ លោកស្រី Roberta Metsola Tedesco Triccas ប្រធានសភាអឺរ៉ុប និងលោក Alessandro Chiocchetti អគ្គលេខាធិការសភាអឺរ៉ុប បានសម្រេចថា កម្មវិធី TikTok មិនត្រូវឱ្យប្រើ ឬតម្លើងនៅលើឧបករណ៍របស់បុគ្គលិក ដូចជា ទូរសព្ទដៃ កុំព្យូទ័របញ្ជាលើអេក្រង់ (tablet) និងកុំព្យូទ័រយួរដៃ ចាប់ពីថ្ងៃទី២០ ខែមីនា ឆ្នាំ២០២៣តទៅ។ សភាអឺរ៉ុបបានចេញអនុសាសន៍ខ្លាំងៗឱ្យ សមាជិកសភាអឺរ៉ុប និងបុគ្គលិកសភាលុបចោលកម្មវិធី TikTok ចេញពីឧបករណ៍ផ្ទាល់ខ្លួនទាំងអស់។ គួររំលឹកថា កាលពីថ្ងៃព្រហស្បតិ៍សប្តាហ៍មុន គណៈកម្មការអឺរ៉ុបដែលជាអង្គនីតិប្រតិបត្តិ និងក្រុមប្រឹក្សាអឺរ៉ុប ដែលតំណាងឱ្យរដ្ឋចំនួន២៧ ជាសមាជិកសហភាពអឺរ៉ុបបានចេញបញ្ជាដូចគ្នានេះ ដោយព្រួយបារម្ភពាក់ព័ន្ធនឹងសន្តិសុខតាមប្រព័ន្ធអ៊ីនធឺណិត។ វិធានការដូចគ្នា នេះត្រូវបានធ្វើឡើងក្នុងរយៈពេលប៉ុន្មានថ្ងៃកន្លងមកនេះ បន្ទាប់ពីរដ្ឋាភិបាលទីក្រុងវ៉ាស៊ីនតោនបានចាត់វិធានការប្រឆាំងនឹងកម្មវិធីចែករំលែកវីដេអូដ៏ពេញនិយមមួយដែលមានក្រុមហ៊ុនចិន ByteDane ជាម្ចាស់កម្មសិទ្ធិ។ ក្រុមប្រទេសលោកខាងលិចកំពុងតែព្រួយបារម្ភជាពិសេស អំពីអ្វីដែលប្រទេសចិនអាចចូលយក ទិន្នន័យដ៏រសើបរបស់អ្នកប្រើប្រាស់នៅជុំវិញពិភពលោក ប៉ុន្តែយ៉ាងណាក៏ដោយក្រុមហ៊ុនមួយនេះបានបដិសេធយ៉ាងដាច់ខាតថា ទីក្រុងប៉េកាំងមិនបានគ្រប់គ្រង ឬចូលយកទិន្នន័យណាមួយនោះឡើយ។ កាលពីខែវិច្ឆិកា ឆ្នាំ២០២២ ក្រុមហ៊ុន TikTok បានទទួលស្គាល់ថា បុគ្គលិកខ្លះនៅក្នុងប្រទេសចិន ពិតជាអាចចូលយកទិន្នន័យរបស់អ្នកប្រើប្រាស់នៅអឺរ៉ុបពិតមែន។ កាលពីថ្ងៃចន្ទ ទី២៧ ខែកុម្ភៈ ឆ្នាំ២០២៣ សេតវិមានបានទុកពេល៣០ថ្ងៃ ឱ្យទីភ្នាក់ងារ-ស្ថាប័នទាំងអស់របស់សហព័ន្ធលុបចោលកម្មវិធី TikTok ចេញពីឧបករណ៍បំពេញការងាររបស់រដ្ឋាភិបាល បន្ទាប់ពីសភាសហរដ្ឋអាម៉េរិកបានចេញបម្រាមមួយកាលពីចុងឆ្នាំ២០២២។ ក្នុងថ្ងៃដដែលនោះរដ្ឋាភិបាលកាណាដាក៏បានហាមឃាត់ការប្រើកម្មវិធី TikTok នៅលើទូរសព្ទ និងឧបករណ៍ទាំងអស់ ក្នុងហេតុផលដូចគ្នា ដោយព្រួយបារម្ភពីសុវត្ថិភាពទិន្នន័យ នៅចំពេលដែលចំណងទាក់ទងរវាងចិន និងកាណាដានៅតែមានភាពរកាំរកូសនឹងគ្នា។ ភ្លាមៗនេះ ក្រុមហ៊ុន TikTok មិនទាន់បញ្ចេញយោបល់យ៉ាងណាចំពោះបម្រាមរបស់សភាអឺរ៉ុប នៅឡើយទេ ក៏ប៉ុន្តែកាលពីសប្តាហ៍មុន ក្រុមហ៊ុនមួយនេះបានអះអាងថាខ្លួនបានការពារទិន្នន័យរបស់អ្នកប្រើប្រាស់ប្រចាំខែប្រមាណ ១២៥លាននាក់ នៅក្នុងសហភាពអឺរ៉ុប៕

ព័ត៌មានសភាទ្វីបអឺរ៉ុប ០២-០៣-២៣- ឈាវ សុផាត ប្រែសម្រួលពី៖ https://menafn.com/1105681962/EU-Parliament-Bans-Tiktok-On-Work-Devices

សភាបណ្តាទ្វីបពាក់ព័ន្ធ៖

ទ្វីអាស៊ី និងអូសេអានី

ទ្វីបអឺរ៉ុប

ទ្វីបអាមេរិក

ទ្វីបអាហ្វ្រិក